Festa e qytetit antik të Amantias riktheu edhe këtë fundjavë atmosferën e veçantë në parkun arkeologjik të fshatit Ploç, në bashkinë e Selenicës.
Në stadiumin e lashtë të Amantias, një nga mjediset më të veçanta arkeologjike të Vlorës, u mblodhën qindra vizitorë vendas dhe të huaj për të festuar një traditë që përçon historinë mijëravjeçare të kësaj zone.
Ngjarja, e njohur si “Festa e Amantias”, është kthyer në një takim simbolik mes brezave, ku historia, kultura dhe mikpritja bashkohen në një mozaik të gjallë të trashëgimisë shqiptare.
Sipas kryeplakut të fshatit Ploç, Adriatik Brahimi, kjo festë vijon një zakon të lashtë që rrënjët i ka në kohët ilire, duke ruajtur të paprekura traditat e zonës nëpërmjet valleve, këngëve polifonike dhe gatimeve tradicionale.
Në aktivitet nuk munguan lojërat popullore dhe sportet tradicionale, që zhvillohen në stadiumin antik të qytetit.
Sipas Orgest Feimit, drejtues i Drejtorisë Rajonale të Trashëgimisë Kulturore në Vlorë, parku arkeologjik i Amantias ka fituar gjithnjë e më shumë vëmendje në vitet e fundit, edhe falë zbulimeve të reja që kanë nxitur interesin e turistëve. Ai theksoi se gërmimet arkeologjike vijojnë dhe priten zbulime të tjera të rëndësishme në të ardhmen.
Banorët e zonës e përjetojnë këtë festë si një mundësi për të ruajtur lidhjet mes komunitetit dhe për të mirëpritur bashkëfshatarët e shpërngulur, të cilët rikthehen në vendlindje për të marrë pjesë në kremtim.
Parku arkeologjik i Amantias mbetet një nga pasuritë më të rëndësishme kulturore të jugut të Shqipërisë. Ndodhet mbi një kodër të fortifikuar me mure mbrojtëse, qyteti i lashtë ka ruajtur gjurmë të çmuara si tempulli i Afërditës, teatri dhe stadiumi.
Deri më sot, vetëm rreth 10% e qytetit është zbuluar, ndërkohë që potenciali arkeologjik i zonës mbetet i jashtëzakonshëm.
Amantia, që në shekullin III para Krishtit u zhvillua ekonomikisht dhe filloi të prodhonte monedhën e saj, mbart një trashëgimi të rrallë që përmes kësaj feste po ringjallet vit pas viti.
