Është pezulluar procesi i numërimit të votave në KZAZ 15 në Kurbin. Urdhri është dhënë nga KQZ, ku Kryekomisionari Ilirjan Celibashki ka udhëzuar që prezent në këtë KZAZ të jenë edhe forcat policore të cilat duhet të marrin masa që gjatë procesit të numërimit të jenë prezent në ambientet e vend numërimit të votave vetëm anëtarët e KZAZ dhe sekretari, anëtarët e grupeve të numërimit, vëzhguesit e subjekteve zgjedhore, vëzhguesit e tjerë të akredituar, kandidatët dhe media, si dhe personeli teknik i autorizuar nga KQZ.
Procesi i votimit dhe numërimit ka pasur shumë problematika në këto zgjedhje vendore, të cilat janë evidentuar edhe nga mbikqyrësit ndërkombëtar.
Monitoruesja e OSBE-ODIHR, Audrey Glover, në një konferencë për mediat, ka deklaruar se është përgjegjësi e KQZ-së që të marrë masa në lidhje me pretendimet për përdorim të makinacioneve shtetërore dhe përfshirje të administratës në fushatën zgjedhore për “Vendoret 2023”.
Ajo ka shtuar se KQZ është organi përgjegjës që të sigurojë që zgjedhjet u realizuan në përputhje me ligjin
Kujtojmë se Partia Socialiste e Shqipërisë kryeson fuqishëm para opozitës në shumicën e bashkive. Kampi socialist deri tani ka marrë 42 bashki ku ka përfunduar votimi, përfshirë edhe bastionet historike të opozitës si Shkodra, Tropoja, Devolli dhe Kukësi.
Nga ana tjetër koalicioni “Bashkë Fitojmë” ka fituar 6 bashki duke e tkurrur hartën e demokratëve me humbjen e bastioneve. “Bashkë Fitojmë” ka fituar Pukë, Has, Himarë, Memaliaj, Mirditë, Fushë Arrëz.
