Komisioni Qendror i Zgjedhjeve i është përgjigjur zyrtarisht Partisë Demokratike lidhur me kërkesën për verifikimin e fletëve të votimit të papërdorura në zgjedhjet e 11 majit 2025.
Në shkresën e firmosur nga Komisioneri Ilirjan Celibashi, bëhet me dije se 99,455 fletë votimi, të cilat i përkasin 233 qendrave të votimit, janë raportuar gabimisht si “0” në procesverbalet përkatëse.
Sipas KQZ-së, numri i përgjithshëm i fletëve të papërdorura arrin në 1,935,328, sipas të dhënave zyrtare të dorëzuara nga çdo qendër votimi. Në këtë shifër përfshihen edhe:
27,340 fletë të papërdorura nga 74 qendra votimi ku u aplikua votimi elektronik (në Vorë dhe Njësinë nr. 10 në Tiranë),
99,455 fletët që u raportuan gabimisht si të përdorura, dhe 5,369 fletë votimi për të cilat ka pasaktësi në raportim, por që konsiderohen gjithashtu të papërdorura.
Përgjigja e KQZ ndaj PD:
I nderuar Z. Nuri
Në përgjigje të kërkesës tuaj lidhur me verifikim të menjëhershëm të fletëve të votimit të përdorura për zgjedhjet e datës 11 Maj 2025, ju informojmë se :
Numri prej 1,935,328 fletë votimi të papërdorura përfshin vetëm sasinë e raportuar të këtyre fletëve sipas procesverbaleve të çdo QV-je.
Këtij numri i duhen shtuar edhe:
27,340 fletët e votimit për 74 QV, ku ështe aplikuar votimi elektronik, ZAZ Nr.27 (Bashkia Vorë) dhe ZAZ Nr. 41 (Njësia Administrative 10, Tiranë). Sikurse mund të kuptohet edhe këto fletë votimi nuk janë përdorur;
99,455 fletë votimi të papërdorura që përbëjnë sasinë e këtyre fletëve për 233 QV, në procesverbalet e të cilave gabimisht është shënuar me “0” numri i fletëve të papërdorura;
5,369 janë fletë votimi të papërdorura por që numrat e tyre në test llogjik vlerësohet se janë pasqyruar me gabime në procesverbalet përkatëse për çdo QV (janë 1,380 QV që kanë raportuar këto të dhëna me gabime).
Duke ju falenderuar për bashkëpunimin
Komisioneri Shtetëror i Zgjedhjeve
Ilirjan CELIBASHI
