Kolegji i Apelimit ka shkarkuar nga detyra prokurorin e Prokurorisë së Rrethit Gjyqësor Fier, Fatmir Lushi.
Në njoftimin e shpërndarë media thuhet se KPK kishte vendosur në 26 mars të 2019 shkarkimin e tij, por ky vendim nuk ishte pranuar nga Lushi i cili e kishte apeluar këtë vendim.
Ndërkohë sot Kolegji i Posaçëm i Apelimit ka lënë në fuqi vendimin e KPK dhe shkarkimin e prokurorit Fatmir Lushi. Ky vendim u mor nga trupa gjykuese e përbërë nga Natasha Mulaj kryesuese, Ardian Hajdari relator, Albana Shtylla, Ina Rama, Rezarta Schuetz anëtarë.
Vendimi për shkarkimin e Lushit erdhi pasi KPK konstatoi probleme me pastërtinë e figurës dhe pasurinë e prokurorit gjatë hetimit administrativ.
Njoftim vendimi nga ana e KPA:
Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Ardian Hajdari relator, Albana Shtylla, Ina Rama, Rezarta Schuetz anëtarë, shpalli vendimin për çështjen (JR) nr.27/2019, datë 20.05.2019, që lidhet me ankimin e subjektit të rivlerësimit Fatmir Lushi, kundër vendimit nr. 125, datë 26.03.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 66, pika 1, germa “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 125, datë 26.03.2019 të Komisionit të Pavarur të Kualifikimit, që i përket subjektit të rivlerësimit Fatmir Lushi. Ky vendim është përfundimtar dhe ka efekt të menjëhershëm.
U shpall sot, në Tiranë, më datë 08.09.2020.
Fatmir Lushi kreu shkollën e Magjistraturës përgjatë viteve 2006-2009. Dhe në vitin 2009, ai u emërua prokuror i Prokurorisë së Shkodrës, ndërsa në vitin 2014 është transferuar në Prokurorinë e Elbasanit.Ndërsa në janar të vitit 2017, Lushi u komandua drejtues i Prokurorisë së Fierit, detyrë të cilën e kryente deri para shkarkimit.
