Në qendër të denoncimit vila luksoze dhe pazaret me koncesionet
Përplasja mes ish-kolegëve në PD merr një kthesë të re, teksa një denoncim i Gazment Bardhit mund të përfundojë në SPAK.
“SPAK-u ka filluar procedimin për hetimin pasuror të Flamur Nokës. Noka shumë shpejt mund të përballet me një situatë të pakënaqshme,” deklaroi avokati i njohur Edmond Petraj në emisionin “Shqip” në DritareTV.
Denoncimi i Bardhit, i bërë në tetor 2022, përfshin akuza për një vilë 760 mijë euro në pronësi të Nokës dhe ngre dyshime për lidhje me një trafikant droge, por edhe për mbrojtjen që Noka i ka bërë biznesmenit Shefqet Kastrati.
“Nuk habitem që Flamur Noka është shqetësuar nga denoncimi që i kam bërë paligjshmërisë së Kastratit të Edi Ramës me Kullën përballë Partisë Demokratike. Nga personi që akuzoi demokratët e Kukësit se ishin të orkestruar nga Edi Rama për protestat kundër traut të Kastratit në Rrugën e Kombit dhe bëri çdo gjë për shuarjen e tyre, mund të presësh gjithçka,” shkruante Bardhi.
Koncesionet problematike
Dy prej koncesioneve më të debatuar të kompanisë “Kastrati” janë në qendër të vëmendjes.
I pari është kulla përballë selisë së PD-së, e cila, siç ka raportuar vazhdimisht Gazeta Reforma, mori leje në kundërshtim me ligjin. Ndërtimi u bë i mundur vetëm pasi qeveria ndryshoi specifikisht nenin 17 të VKM-së në qershor 2022, duke hequr kufizimin që shtesa nuk mund të ishte më shumë se 2%.
Ky ndryshim erdhi vetëm 10 ditë pasi Bashkia e Tiranës ishte detyruar të mos miratonte lejen për shtimin e disa kateve. Ironikisht, ky favorizim ndodhi në kohën kur kryeministri Rama dhe ministrat e tij kishin nisur një aksion të bujshëm kundër pallateve që kishin shkelur lejet e ndërtimit në Tiranë.
I dyti është koncesioni problematik i traut në rrugën e Kukësit, ku kompania e Kastratit dhe Salillarit jo vetëm që vendosi traun pa i bërë ende një dalje qytetit, por po zbaton edhe një sistem të dyshimtë pagesash. Për tarifën prej 5 eurosh, kompania ka vendosur një kurs të fiksuar këmbimi, duke detyruar qytetarët të paguajnë gjithmonë 660 lekë, pavarësisht rënies së euros në treg.
Barra e rëndë mbi qytetarët
Këto koncesione janë pjesë e një vale të re pagesash që do të rëndojnë më tej mbi qytetarët.
Deri në 2025, numri i rrugëve me pagesë do të arrijë në tre (Milot-Rrëshen, Thumanë-Kashar, Tuneli i Vlorës), me perspektivë për të paktën gjashtë të tilla në vitet në vijim. Të dhënat krahasuese konfirmojnë se Shqipëria tashmë ka tarifat më të larta të pagesës në rajon.
Situata bëhet edhe më e rëndë për xhepat e shqiptarëve kur marrim parasysh se vendi renditet i treti në botë për çmimet e larta të naftës, me një çmim 60% më të lartë se mesatarja globale. Sipas ekspertëve, kjo barrë e dyfishtë e koncesioneve dhe çmimeve të larta të karburantit po rëndon në mënyrë disproporcionale mbi një popullsi që ka të ardhura për frymë vetëm sa 34% e mesatares së BE-së.
Nëse konfirmohen hetimet e pretenduara nga avokati Petraj, pritet të hidhet dritë jo vetëm mbi akuzat ndaj Nokës, por edhe mbi rrjetin e lidhjeve që kanë mundësuar këto koncesione problematike, të cilat po rëndojnë çdo ditë e më shumë xhepat e qytetarëve shqiptarë.
/gazetareforma.com
