Ministria e Arsimit, Shkencës, Teknologjisë dhe Inovacionit në Kosovë ditën e sotme ka dalë me një vendim të ri në lidhje me vitin e ri akademik.
Arsimi i lartë publik në Kosovë do të jetë pa pagesë, nisur nga 1 tetori i këtij viti. Në momentin e shpalljes së vendimit të Qeverisë së Kosovës, kryeministri Albin Kurti sqaroi se shkollimi pa pagesë do të vlejë për të gjithë ata që duan të studiojnë në nivelet “bachelor” dhe “master”.
Për studentët e doktoratës do të ketë lehtësime të veçanta, tha Kurti.
Ai shtoi ndër të tjera se ministrja e Arsimit, Shkencës, Teknologjisë dhe Inovacionit e Kosovës, Arbërie Nagavci, ka nënshkruar tashmë udhëzimin administrativ, me të cilin “arsimi i lartë do të bëhet njësoj i qasshëm për të gjithë”.
“Kjo padyshim se kontribuon në barazinë sociale në vend. Ne besojmë se në këtë formë, nxisim interesimin për studime të larta, duke përmirësuar kësisoj nivelin e përgjithshëm arsimor të popullsisë sonë”, tha Kurti.
Mësohet se në universitetet publike në Kosovë, studentët e nivelit “bachelor” kanë paguar deri më tani 25 euro për semestër, përveç vitit të parë të studimeve ku studimet ishin falas.
Semestri për nivelin “master” ka kushtuar 150 euro, ndërsa për doktoraturë në total 500 euro.
