Kosova siguron 2 milionë vaksina, del huq “ndihma” e premtuar nga Shqipëria Kryeministri i Kosovës Avdullah Hoti ka lajmëruar se kanë arritur të sigurojnë 1 milion e 855 vaksina kundër koronavirusit.
Në një konferencë për media, Hoti tha se ditën e djeshme janë konkretizuar marrëveshjet për sigurimin e vaksinave.
“Dje janë konkretizuar marrëveshjet me Pfizer për 535 mijë vaksina, edhe me Austrinë për 600 mijë vaksina, si dhe me COVAX më herët janë kryer proceduar për 720 mijë vaksina”, tha Hoti.
Ai tha se fillimisht do të vaksinohet stafi mjekësor e pastaj do të vijnë me rradhë kategoritë e tjera të përcaktuara.
“Ashtu si na vijnë sasitë e vaksinave do të kryhet vaksinimi i qytetarëve. Fillimisht mjekë dhe stafi tjetër shëndetësor, personat mbi moshën 65 vjeç, personat që kanë rrezikshmëri të lartë e cila përcaktohet nga lista e sëmundjeve”, tha Hoti.
Hoti shtoi se synojnë që brenda dite të vaksinohen 20 mijë qytetarë.
“Kapaciteti ditor i institucioneve shëndetësore është ta vaksinohen rreth 20 mijë qytetarë brenda dite”, tha Hoti.
Vaksinat pritet që të arrijnë në fillim të muajit shkurt.
Kryeministri Rama në prezantimin e kontratës me Pfizer pak ditë më parë. tha që një pjesë e vaksinave do ti dhurohet Kosovës, për vaksinimin e bluzave të bardha.
“Kosovës do t’i dhurojmë një sasi për vaksinimin e bluzave të bardha të spitalit të Prishtinës. I kam kërkuar ministres së shëndetësisë që të flasë me homologun në Kosovë. Personeli shëndetësor atje do të ketë mundësinë të vaksinohet si të gjithë kolegët në Shqipëri”.
“Ky nuk është fundi i përpjekjes sonë për të garantuar që asnjë dozë e vaksinës të mos mungojë deri në fund. Do vazhdojmë të përpiqemi me këmbëngulje dhe pa pushim që plani i vaksinimit të vazhdojë sipas parashikimeve”, deklaroi Rama.
/Gazetareforma.com/
