Agjencia e Ushqimit dhe Veterinarisë (AUV) ka marrë masa për kontrollin e ngarkesave me produkte shtazore, kafshë dhe shpezë të gjalla që vijnë nga zona e Durrësit.
AUV po bashkëpunon ngushtë me Autoritetin Kombëtar të Veterinarisë dhe Mbrojtjes së Bimëve të Shqipërisë për të marrë informacione të përditësuara lidhur me situatën zoonotike dhe rrezikun nga gripi i shpendëve, nën tipi H5N1.
Aktualisht, një fermë afër Durrësit është identifikuar si e prekur nga ky grip.
“Në përputhje me legjislacionin në fuqi dhe në bashkëpunim me autoritetet shqiptare, AUV ka vendosur masa të menjëhershme të kontrollit kufitar. Inspektorët veterinarë kufitarë janë urdhëruar të kryejnë kontrolle të detajuara mbi ngarkesat me produkte ushqimore me origjinë shtazore, si dhe mbi kafshët apo shpendët e gjalla, duke zbatuar në përpikëri procedurat e kontrollit për të parandaluar përhapjen e mundshme të sëmundjes në vendin tonë”, bëhet e ditur në njoftim.
Për momentin, gripi i shpendëve është i kufizuar vetëm në një fermë të izoluar, dhe autoritetet shqiptare kanë ndërmarrë masa urgjente për të kufizuar përhapjen e tij. Kjo përfshin izolimin e zonës dhe ndalimin e lëvizjes së brendshme në atë rajon.
“Nuk është vlerësuar e nevojshme vendosja e masave kufizuese për importin e përgjithshëm, pasi Kosova nuk ka import të shpendëve të gjalla nga kjo zonë. Aktualisht, rreziku i përhapjes së gripit H5N1 përmes importit mbetet i ulët. Megjithatë, AUV është në gjendje gatishmërie dhe do të përshtatë masat sipas zhvillimit të situatës”.
Gjithashtu, fermerëve që mbajnë shpendë u kërkohet të zbatojnë pa vonesë masat e biosigurisë në fermat e tyre për të parandaluar përhapjen e gripit të shpendëve (Avian Influenza).
“Përmes shoqatave përkatëse, të gjithë fermerët komercialë janë njoftuar për masat mbrojtëse të biosigurisë, të cilat janë thelbësore për mbrojtjen e shpendëve të tyre. Aktivizimi i sistemit të vetëkontrollit dhe zbatimi i masave të biosigurisë në fermë janë mënyrat më efikase për të përballuar këtë sëmundje. Gripi i shpendëve përhapet kryesisht nga shpendët shtegtarë, çka e bën sfidues parandalimin e tij për çdo vend. Prandaj, bashkëpunimi i fermerëve dhe zbatimi i masave të duhura është vendimtar për mbrojtjen e fermave dhe të sektorit të shpendarisë në vend”./ Monitor
