Kryeministri Edi Rama ka një mesazh për të gjithë ata që kritikuan vendimin e komitetit Teknik për të mos hequr orën policore. Në një postim në rrjetet sociale, Rama shkruan se kush bën krahasime me vendet e tjera, të mos harrojë se prej kohësh Shqipëria është në krye të klasifikimit në Europë për numrin e ulët të infektimeve dhe humbjeve të jetëve. Ai thotë se qeveria e di mirë atë që bën dhe nuk do të bjerë në kurthin e euforisë.
“Kush bën krahasime me vendet e tjera për orën policore antiCovid, të mos harrojë se prej disa kohësh tanimë jemi në krye të klasifikimit në Europë për ultësinë e nivelit të infektimeve e të humbjeve të jetës! Dmth e dimë mirë atë që bëjmë dhe nuk do të biem në kurthin e euforisë!”, shkruan Rama.
Komiteti Teknik mori dje vendimi për të shkurtuar orën policore nga 23:00 deri në 06:00 duke filluar që prej 1 qershorit. Gjithashtu u lejua qarkullimi pa maska në ambiente të hapura.
Nga ana tjetër qeveria e Kosovës vendosi në mbledhjen e sotme që ta heq totalisht orën policore, e gjithashtu do të lejojë lëvizjen pa maska në ambiente të hapura. Ndër të tjera u zgjat deri në orën 23:00 orari i punës për shërbimet e gastronomisë.
