Deputetët e Kosovës vijojnë të dështojnë të konstituojnë përbërjen e re të Kuvendit edhe katër muaj pas zgjedhjeve të 9 shkurtit, duke e lënë vendin pa institucione funksionale. Procesi është bllokuar kryesisht për shkak të mosmarrëveshjeve për emërimin e kryetarit dhe nënkryetarëve të Kuvendit.
Për të 36-ën herë që nga 15 prilli, ligjvënësit janë mbledhur pa arritur të kapërcejnë ngërçin politik. Seancat e radhës janë caktuar për 25 qershor. Partitë kryesore – PDK, LDK, AAK dhe Lista Serbe – refuzojnë të propozojnë anëtarë për komisionin e votimit të fshehtë, i cili do të mundësonte zgjidhjen e kryetarit nga Vetëvendosje, që deri tani nuk ka arritur të marrë 61 vota në votim të hapur.
Ekspertët kushtetues kritikojnë mungesën e një afati të përcaktuar nga Kushtetuta për konstituimin e Kuvendit, duke e cilësuar këtë boshllëk si shkas të keqpërdorimit politik dhe bllokimit të procesit. Kadri Kryeziu, ish-nënkryetar i Gjykatës Kushtetuese, thotë se ky situatë nuk është parashikuar nga hartuesit e Kushtetutës dhe po përdoret për qëllime destruktive.
Vetëvendosje, si fituese e zgjedhjeve, insiston që Albulena Haxhiu të zgjidhet kryetare, por kjo propozim nuk pranohet nga partitë tjera, që e konsiderojnë atë një figurë përçarëse. Për më tepër, është ngritur një çështje kushtetuese lidhur me ndryshimin e mënyrës së votimit nga i hapur në të fshehtë, e cila tashmë është dërguar në Gjykatën Kushtetuese për interpretim.
Profesori i së drejtës kushtetuese, Mazllum Baraliu, thekson se partitë po shfrytëzojnë boshllëkun ligjor për të fshehur paaftësinë për të formuar institucione. Ai shton se mungesa e afateve ka shkaktuar tensione politike dhe inate, duke theksuar se përgjegjësia bie mbi të gjitha tek partia fituese dhe partitë e tjera, që duket se nuk kanë interes për funksionimin e shtetit, por vetëm për pushtet.
Përfundimi i konstituimit të Kuvendit, me zgjedhjen e kryetarit dhe pesë nënkryetarëve, është i domosdoshëm për formimin e Qeverisë së re. Presidentja Vjosa Osmani ka paralajmëruar se kjo vonesë minon kredibilitetin e institucioneve dhe pengon avancimin e Kosovës në agjendën euroatlantike.
Në këtë kontekst, përfaqësuesit e QUINT-it dhe shefi i Zyrës së Bashkimit Evropian në Kosovë kanë kërkuar nga kryeministri në detyrë, Albin Kurti, të ndërmarrë hapa urgjentë për të përmbyllur procesin dhe për të garantuar stabilitetin dhe mirëqenien e qytetarëve./ REL
