Kuvendi i Kosovës sërish nuk arriti të konstituohej, duke shënuar dështimin e 40-të në përpjekjet për të zgjedhur kryetarin dhe për të hapur rrugën për formimin e institucioneve të reja pas zgjedhjeve të 9 shkurtit.
Sërish mungoi kuorumi i nevojshëm për krijimin e Komisionit Zgjedhor, i cili do të kishte detyrën të zgjidhte kryeparlamentarin.
Nga 100 deputetë të pranishëm, vetëm 51 votuan pro, ndërsa pjesa tjetër nuk morën pjesë në votim, pa asnjë abstenim apo votë kundër.
Partitë kryesore, përfshirë PDK, LDK, Listën Serbe, AAK dhe NISMA, nuk propozuan emra për anëtarët e komisionit, duke shkaktuar kështu dështimin e seancës. Procesi do të vazhdojë të enjten në orën 11:00.
Ky bllokim i vazhdueshëm ka shkaktuar reagime të forta në publik dhe në politikë, pasi vendi qëndron tashmë pesë muaj pa institucione funksionale. Përplasjet midis partive janë të ashpra, me akuza të ndërsjella për shkaktimin e bllokadës.
Para seancës, deputeti i LDK-së, Armend Zemaj, akuzoi Lëvizjen Vetëvendosje për mosrespektim të Kushtetutës dhe vendimeve të Kuvendit.
Ndërsa deputeti i PDK-së, Mërgim Lushtaku, kritikoi mungesën e kryeministrit në detyrë, Albin Kurti, në seancat e Kuvendit, duke e parë këtë si shenjë të gatishmërisë për të shkelur ligjet me qëllim ruajtjen e pushtetit.
Nga ana e tij, Dimal Basha nga LVV i hodhi përgjegjësinë partive të tjera për bllokimin e konstituimit dhe theksoi se përdorimi i votimit të fshehtë po tenton të përdoret pasi votimi i hapur nuk ka sjellë rezultate. Ai gjithashtu theksoi se Gjykata Kushtetuese ka lejuar çdo formë votimi.
Ndërkohë, shefja e grupit parlamentar të AAK-së, Time Kadrijaj, kritikoi kryeministrin në detyrë, duke thënë se Kurti sillet në mënyrë kontradiktore, duke marrë vendime që janë në kundërshtim me ligjin, pasi ai është ende në detyrë.
