Prokuroria e Posaçme Kundër Korrupsionit dhe Krimit të Organizuar ka sekuestruar telefonin celular të nënkryetarit të Bashkisë Pukë, Ndue Suma, në kuadër të një hetimi për krime të dyshuara zgjedhore.
Ky veprim hetimor është pjesë e një procesi më të gjerë hetimesh, që lidhen me shkelje të mundshme gjatë zgjedhjeve parlamentare të 11 majit 2025.
Deri më tani, SPAK nuk ka dhënë ende një deklaratë zyrtare lidhur me çështjen apo me pozicionin e zyrtarit lokal në këtë hetim.
Në prag të zgjedhjeve të fundit, u krijua një Task-Forcë e posaçme në bashkëpunim mes SPAK, Prokurorisë së Përgjithshme dhe Komisionit Qendror të Zgjedhjeve, me qëllim ndjekjen dhe parandalimin e krimeve zgjedhore.
Sipas të dhënave zyrtare, janë regjistruar 107 kallëzime për krime të tilla në mbarë vendin. Deri më tani, janë hapur hetime për 47 raste nga prokuroritë përkatëse, ndërsa 6 kallëzime janë referuar drejtpërdrejt SPAK-ut për shqyrtim të mëtejshëm.
