Mjeku Niko Nika ka rënë në prangat e policisë ditën e sotme pasi akuzohet për korruspion dhe falsifikim të tamponëve për COVID-19. Ai u arrestua nga operacioni i SPAK, ndërsa ishte mjek në Institutin e Higjenës. Ai kishte rolin e sekserit dhe kontaktohej nga nga qytetarë të ndryshëm, të cilët ia dërgonte tek Eda Myftari, punonjëse në Drejtorinë Rajonale të Operatorit të Shërbimit të Kujdesit Shëndetësor.
Njoftimi i policisë:
“Nga Seksioni për Hetimin e Korrupsionit u bë kapja dhe ndalimi i shtetasit N. N., 66 vjeç, pasi Gjykata Kundër Korrupsionit dhe Krimit të Organizuar Tiranë i ka vendosur masën e sigurisë “Arrest në burg” për veprat penale “Korrupsion pasiv i personave që ushtrojnë funksione publike” kryer në bashkëpunim, “Falsifikimi i dokumenteve shëndetësore”, kryer në bashkëpunim, më shume se një herë dhe “Ushtrim, ndikimi i paligjshëm ndaj personave që ushtrojnë funksione publike” kryer në bashkëpunim, më shumë se një herë”, njofton zyrtarisht Policia.
Report Tv kishte bërë më herët publike biseda të mjekut ku ndërhynet që të bëhej tamponi jashtë radhe, kundrejt parave.
“Niko si kalove, me dëgjo se e kam urgjente … me duhet me bo një tampon me çdo lloj shifre të mundshme, e du urgjent … Le të kërkoj ca te doj, me thuaj ca do, na ja ku i ke, ti coj personin dhe te hyj. Si i bohet? Niko i thotë: Ja të flas me nji matrapaze që kena aty. Menjëherë me pas personi nen hetim Niko Nika telefonon Eda Myftarin të ciles i thotë: Degjo, me bo nji tampon me pagesë, e bejmë dot neser, dhe sa ti them. Eda i thotë: Po bëhet pra, se ti e di shumë mir që bëhet, ca më pyet kot … ik tani flasim nesër”, ishte biseda e mjekut me një person të quajtur Gentian Qesku në 18 qershor.
Hetimet për mjekun janë pjesë e dosjes së SPAK që çoi në arrestimin e 14 mjekëve dhe zyrtarëve të shëndetësisë që lëshonin vërtetime e dokumenete pa u paraqitur personi.
