Koronavirusi po shpërfaq një sërë aspektesh shëndetësore, por edhe ekonomike e sociale të shoqërisë shqiptare.
Dy spitalet e dedikuar për Covid-19 në vendin tonë, kanë mbushur tashmë kapacitetet e tyre. Kjo ndodh, në kohën që ministrja e Shëndetësisë Ogerta Manastirliu dhe kryeministri Edi Rama premtojnë e propagandojnë se në Shqipëri ka kapacitete për të gjihë personat e infektuar me koronavirus.
Sipas Shqiptarja.com, janë së paku 20 persona, që në harkun e 3 muajve, janë larguar nga Rinasi me charter të dedikuar. Zyrtarët shprehen se ka përditë aplikime të personave të infektuar me koronavirus, që duan të mjekohen jashtë Shqipërisë.
Shqiptarët e infektuar me Covid-19 ia kanë besuar shëndetin më së tepërmi eksperiencës të spitaleve turke dhe atyre italiane.
Shqiptarët zgjedhin të shkojnë për shërim nga koronavirusi në Itali, edhe pse ky është një vend i prekur po ashtu nga Covid-19. Charteri dizinfektohet përpara se të marrë edhe pacientët.
Akoma më e rëndë bëhet situata për shqiptarët, pasi prej disa ditësh në laboratoret private ka nisur testimi serologjik për Covid-19 për shtetasit shqiptarë me vendim të Ministrisë së Shëndetësisë që mban datën 19 korrik 2020.
Qeveria zgjodhi që këtë shërbim ta kalojë në struktura private, edhe pse ligji shqiptar e parashikon se shërbimi duhet ofruar falas.
Kur kanë kaluar vetëm disa ditë nga certifikimi i këtyre laboratoreve nga Instituti i Shëndetit Publik, është vënë re edhe shkelja e parë. Nga një vëzhgim i kryer rezulton se shumë prej laboratorëve që e ofrojnë këtë shërbim kanë të njëjtin çmim, 4000 lekë të reja. (Lexo këtu)
Shqiptarët edhe për t’u kuruar zgjedhin spitalet jashtë, ndërsa duket se edhe parulla “shëndetësia falas” është vjetruar tashmë. Shumë kanë zgjedhur të kurohen jashtë, gjë që tregon edhe besim e ulët të qytetarëve tek shëndetësia e qeverisjes sonë.
