Fluksi i madh me të infektuar ditët e fundit në repartin e Infektivit (Covid 1) dhe në spitalin “Shefqet Ndroqi” (Covid 2), ka bërë që qeveria të marrë vendimin për hapjen e spitalit “Covid 3” i cili që dje ka pritur edhe pacientët e parë.
Mësohet se mbrëmë rreth orës 20:00 janë shtruar 6 pacientët e parë në ambientet e këtij spitali të përshtatur për fluksin në rritje të të shtruarve me korona.
“Covid 3” ka një kapacitet me 150 shtretër, ndërkohë që hapja e tij u lajmërua edhe pak ditë më parë.
Tashmë në vijën e parë të zjarrit hyn edhe godina “Covid 3”, që është vendosur në ish-repartin e Kirurgjisë në Qendrën Spitalore Universitare “Nënë Tereza”.
Spitali do të shërbejë për trajtimin e pacientëve të infektuar me koronavirus, duke qenë se kohët e fundit në vendin tonë ka pasur një rritje të ndjeshme të rasteve të infektuar me koronavirus.
Burime bëjnë të ditur se, aktualisht në spitalin Covid-3 janë shtruar 6 pacientë të cilët janë infektuar me virusin vdekjeprurës.
Kryeministri Edi Rama inspektoi disa ditë më parë godinën dhe deklaroi se brends Covid3 janë gjithsej 150 shtretër, ndërsa në shërbim mjekësor janë 50 mjekë dhe infermierë.
Që prej fillimit të pandemisë e deri më tani në Shqipëri janë infektuar 20,634 persona dhe kanë humbur jetën 502 të tjerë.
/GazetaReforma.com/
