Një punonjës i zyrës së zv. presidentit amerikan, Mike Pence, ka rezultuar pozitiv në testin për koronavirus.
Pence, i cili është edhe përgjegjësi për kalimin e situatës së krijuar nga COVID-19 në SHBA, nuk ka pasur kontakte të afërta me të infektuarin.
Konfirmimi ka ardhur të premten nga sekretarja e tij për shtyp, Katie Miller.
“Këtë mbrëmje mësuam se një pjesëtar i zyrës së zv. Presidentit, rezultoi pozitiv në testin për koronavirus. As presidenti Donald Trump dhe as Pence nuk kanë pasur kontakte të afërta me këtë person”, thuhej në deklaratën për shtyp të zyrës së Pence.
Miller shtoi më tej, se për personin në fjalë ka nisur gjurmimi i kontakeve.
Pjesa më e madhe e punonjësve të Shtëpisë së Bardhë vijojnë të punojnë në zyrë.
Pas këtij rasti, nuk dihet nëse stafi do të izolohet apo do të dezinfektohet ambjenti.
Ish-shefi i stafit të Shtëpisë së Bardhë, Mick Mulvaney dhe Sekretarja për Shtyp, Stephanie Grisham, janë duke punuar nga shtëpia, pas kontaktit me zyrtarin brazilian të prekur nga virusi.
Ndërkohë Presidenti Trump dhe vajza e tij, Ivanka, kanë rezultuar negativ në testin për koronavirusin.
Aktualisht në SHBA janë regjistruar 19.774 raste, nga të cilët 275 kanë ndërruar jetë.
