Arben Ahmetaj, ministri i Rindërtimit dhe koordinator për situatën e Emergjencës Arben ishte i ftuar në “Opinion”, ku ka folur më shumë rreth paketës ekonomike dhe ndihmave në kuadër të masave për parandalimin e koronavirusit.
Ahmetaj deklaroi se të 60 mijë e 400 personat që janë përfshirë në listë, do ta përfitojnë pagën minimale për mbylljen e biznesit, ndërsa për qytetarët që janë ankuar se u është refuzuar kjo pagë, tha se ata kanë mundësi ta ankimojnë po në të njëjtën faqe ku kanë bërë aplikimin.
“Rrogën minimale do ta përfitojnë të 60 mijë e 400 që janë në atë listë. Atyre që u refuzohen duhet të ankohen. Te tatimet është një anketë. Dhe nuk është 10 mijë numri i atyre që e kanë marrë por gati 15 mijë. Ka një mundësi ankimimi në të njëjtin website ku keni bërë aplikimin. Ata që nuk kanë llogari bankare, mund ta hapin një llogari bankare. Do ta marrin nëpërmjet bankës, edhe nëse u ka skaduar dokumenti. ID të skaduara do të njihen deri në fund të pandemisë. Është urdhër i ministrit të Brendshëm”, u shpreh Ahmetaj.
Më tej, Ahmetaj ka bërë një parashikim, duke thënë se në javën e dytë të majit në vend do të rikthehet lëvizja “afër normalitetit”, por shtoi se kjo lëvizje do të shoqërohet me masa të rrepta sanitare si distanca, përdorimi i maskave dhe dorezave.
“Në javën e dytë të majit do të kemi lëvizje afër normales, por me masa ekstreme sanitare. Le të themi që do të funksionojë ndërmarrja me 2 apo 3 turne, por do të ketë masa të rrepta si distanca, maskat, dorezat”, u shpreh Ahmetaj.
Ahmetaj, shpjegoi ndër të tjera se të gjitha bizneset e lejuara për punë, mund të punojnë edhe pas orës 13:00.
“Policia është shumë e qartë që nuk do të pengojë asnjë biznes të punojë pas orës 13:00, përveç bizneseve specifike që nuk janë të lejuara”, u shpreh Ahmetaj.
Vendime të tjera:
- Punonjësit në të zezë (pra të pasiguruarit) nuk do të përfitojnë nga paketa e luftës.
- Punonjësit sezonalë, që kanë punuar jashtë vendit, por tashmë kufijtë janë mbyllur, mund të shihen tek pagesa e papunësisë, por duhet me pare të regjistrohen si të papunë.
- Pagesat e sigurimeve nuk shtyhen.
- Kufijtë janë të mbyllur.
- Bursat e studentëve do vijojnë të paguhen.
- Qeratë e tërmetit do vijojnë të paguhen.
