Në emisionin e mëngjesit “Koha për t’u zgjuar”, eksperti i pensioneve Kujtim Hoxha foli për mënyrën e sigurimit të bujqve dhe blegtorëve.
Ai dha sqarime të detajuara mbi kushtet që duhet të plotësohen si dhe dokumentacionin e nevojshëm për përfitimin e statusit të të siguruarit.
“Të vetëpunësuar në bujqësi ose bujqit privat kanë nisur të sigurohen që në 1.10.1993. Është parashikuar mënyra se si dhe në çfarë kushtesh duhet të sigurohet i vetëpunësuari në bujqësi. Duhet të ketë tokën bujqësore me ligjin 7501 ose kanë tokë me qera me kontratë, duhet të jenë banorë të zonës ku ushtrojnë aktivitetin, tha ai.
Dokumentet që kërkohen për regjistrimin si të siguruar janë:
• Një certifikatë që tregon gjendjen familjare në datën 1 gusht 1991,
• Dokumenti që provon përfitimin e tokës sipas ligjit 7501 (merret në komunë),
• Dhe aplikanti duhet të jetë mbi moshën 16 vjeç.
Gjithashtu, eksperti sqaroi edhe se shuma e kontributit vjetor ndryshon sipas zonës gjeografike.
“Pagesa për zonat fushore ka nisur me 1620 lekë të rinj në vit deri në 2002, sot është 42 mijë lekë, ndërsa në zonat malore parashikohet në shifrën 32 mijë lekë të reja në vit.
Gjithashtu bujqit kanë të drejtë të blejnë periudha edhe për periudha që mund të kenë mbetur pa siguruar. Por do ti paguajnë me tarifat e sotme, jo me shifrat që kanë qenë psh deri në 2002”, tha ai.
