Deputetët e Kuvendit të Kosovës do të mblidhen sërish sot për të tentuar, për herë të 18-të, konstituimin e legjislaturës së nëntë, proces që ka mbetur i bllokuar që nga seanca e parë më 15 prill.
Mbledhja do të rinisë në orën 10:30, por nuk pritet ndonjë zhvillim thelbësor, pasi ngërçi rreth zgjedhjes së kryetarit të Kuvendit mbetet i pazgjidhur.
Lëvizja Vetëvendosje, si forca e parë nga zgjedhjet e 14 shkurtit, në bashkëpunim me Guxo dhe Alternativën, ka propozuar Albulena Haxhiun për kryetare të Kuvendit, por nuk ka siguruar shumicën prej 61 votash të nevojshme.
Propozimi është kundërshtuar nga PDK dhe AAK, të cilat kanë kërkuar një emër tjetër, ndërsa LDK ka shfaqur refuzim të prerë ndaj çdo kandidature që vjen nga Vetëvendosje.
Kryesuesi i seancës, Avni Dehari, ka propozuar që votimi për kryetarin të bëhet në mënyrë të fshehtë, por kjo nuk ka gjetur mbështetje mes partive. Vetëvendosje ka kërkuar gjithashtu ndryshimin e ritmit të seancave, nga një herë në 48 orë, siç e kërkon rregullorja në një herë në javë, por edhe ky propozim ka mbetur pa konsensus.
Presidentja Vjosa Osmani është përfshirë në përpjekjet për zhbllokimin e situatës përmes takimeve me përfaqësuesit e partive, por bisedimet nuk kanë sjellë rezultate konkrete. Ngërçi vazhdon.
