Ish-ministri i Jashtëm i Kosovës, Glauk Konjufca ka thënë se nëse ambasada e sapohapur në Jeruzalem kushëtzon integrimin në BE, ajo mund të ndryshohet. Konjufca ka thënë se për sa kohë nuk ka kufizime, ambasada do të mbetet aty, por çështja do te rishqyrtohet nëse Bashkimi Europian nuk e pranon diçka të tillë për integrimin në Union. Kështu ish-ministri la të kuptohet se nëse Lëvizja VetëVendosje vjen në pushtet në zgjedhjet e 14 shkurtit, ambasada mund të zhvendoset nga Jeruzalemi.
“Ambasada do të mbetet aty ku është deri nëse eventualisht ne kushtëzohemi të mos jetë aty. Nëse gjatë procesit të integrimeve evropiane, BE e kushtëzon hyrja tonë në BE përmes ndryshimit të lokacionit të Ambasadës sonë në Jerusalem, unë mendoj se kjo do të duhej të rishqyrtohej meqenëse për Kosovën është jetike që ne të bëhemi pjesë e BE-së”- ka thënë Konjufca.
Pak ditë më parë Kosova dhe Izraeli vendosen marrëdhëniet diplomatike mes tyre duke njohur njëra-tjetrën si shtete. Ngjarja u përshëndet nga Shtetet e Bashkuara të Amerikës, por u prit me rezerva nga Bashkimi Europian. Përfaqësues të BE u shprehën se Kosova duhet të rreshtohet krah BE, vendet e së cilës i kanë ambasadat në Tel Aviv. Ndër të tjera, Kosovës iu kujtua se cilat janë parimet të cilave duhet t’u përshtatet për t”u antarësuar në Union.
