Presidenti aktual i SHBA, Donald Trump pas trazirave që u shkaktuan nga mbështetësit pro tij në ndërtesën e Kongresit (Kapitol Hill) në Uashington, është larguar për një udhëtim në Camp David.
Lajmi është konfirmuar nga mediat amerikane nga një zyrtar i Shtëisë së Bardhë, pjesë e administratës Trump.
Mediat vendase, kanë shkruar se kufizime të tilla për fluturime drejt zonës së Camp David, sipas protokollit zbatohen kur presidenti largohet nga Uashingtoni, si një masë sigurie kundër një sulmi të mundshëm ajror.
Duke pasur parasysh se SHBA ka kufizuar fluturimet edhe për shkak të situatës nga pandemia, por edhe prej trazirave, përsëri Trump ka zgjedhur që të udhëtojë.
Ky udhëtim erdhi pikërisht pasi ndërtesa e Kapitolit në Uashington u pushtua dhe u vandalizua nga protestuesit pro-Trump që kërkonin të përçanin dhe përmbysnin rezultatet e zgjedhjeve dhe të parandalonin marrjen e mandatit të certifikuar presidencial nga Kongresi, të Joe Biden.
Kujtojmë se gjatë trazirave të djeshme, të dyja dhomat e Kongresit Amerikan, u bastisën pasi Policia e Kapitolit nuk arriti që të ndalte turmën e protestuesve.
Bëhet me dije se Kompleksi Camp David, ku Trump ka udhëtuar sot, është përdorur në të kaluarën nga administratat e presidentëve të ndryshëm të SHBA-së, për për samitet me udhëheqësit botërorë. Në këtë kompleks janë nënshkruar edhe marrëveshje historike paqeje mes vendeve të ndryshme, si përshembull midis Egjiptit dhe Izraelit në vitin 1978 pas konfliktit mes tyre. Kjo marrëveshje u njoh me emrin e vendit ku u nënshkrua, si Marrëveshja Camp David.
Ajo që të bën përshtypje është fakti që Presidenti Donald Trump gjatë shumicës së mandatit të tij presidencial, por edhe gjatë periudhës së zgjedhjeve të 3 nëntorit e pas tyre, e ka shmangur kompleksin Camp David, duke preferuar Kompleksin e tij privat të Mar-a-Lagos, në klubin privat në Palm Beach të Floridas./Gazetareforma.com/
