Kryeministri i vendit, Edi Rama ka zhvilluar konferencën e fundit për shtyp për këtë vit, duke bërë balancet se si ishte ky vit për Shqipërinë.
Gjatë konferencës ai u pyet në lidhje me qëndrimet e tij për ministra apo ish-ministra që hetohen nga SPAK. Ai u shpreh se të vetmen përgejgjësi ka qeverisjen, pastaj përgjegjësia penale është personale e çdokujt. Rama theksoi në analizën e tij se Partia Socialiste kishte hapur rrugën drejtësisë për të goditur fenomenin e korrupsionit në nivele të larta.
“Nuk besoj se ka ndryshuar gjë, që përgjegjësia qeverisëse patjetër është e kryeministrit, ndërsa përgjegjësia penale është individuale. Nuk ka përgjegjësi të ndarë kur është fjala për individë, të cilët abuzojnë me detyrën prapa kurrizit të të tjerëve dhe përpiqen të përfitojnë duke shfrytëzuar mundësinë që u jep detyra.
Unë jam njeriu më i interesuar që asgjë që përbën shkelje të ligjit dhe një dëm të interesit të publikut të mos kalojë pa u ndëshkuar. Ky është momenti për të ndarë rrugët për të gjithë ata që tradhtojnë qëllimet e përbashkëta. Ne e kemi hapur këtë rrugë. E kam thënë që na duhet një drejtësi që të godasë ata që janë të veshur me pushtet. Të godasë fenomene, fakte që tregojnë se një individ ka shkelur ligjin”, tha Rama.
