Një konflikt për çështje pronësie në fshatin Pla, në njësinë administrative të Hasit, ka degjeneruar në dhunë fizike, duke çuar në arrestimin e një të reje 21-vjeçare. Policia njoftoi se ka ndaluar në flagrancë shtetasen me inicialet A. S., e cila akuzohet për “Plagosje të rëndë me dashje” dhe “Plagosje të lehtë me dashje”.
Sipas hetimeve paraprake, e reja dyshohet se ka goditur me mjete të forta një çift bashkëshortësh, A. J., 65 vjeç, dhe V. J., 60 vjeçe, gjatë një përplasjeje që dyshohet të ketë pasur si motiv mosmarrëveshjet për pronësinë e një parcele toke.
Pas incidentit, A. J. është dërguar në spital, ku ka marrë ndihmën e nevojshme mjekësore dhe ndodhet jashtë rrezikut për jetën. Ndërkohë, gruaja e tij, V. J., mbetet nën kujdesin e stafit mjekësor për shkak të plagëve të marra.
Njoftimi i policisë:
Në vijim të informacionit të dhënë dje, për një konflikt për motive pronësie në fshatin Pla, bëjmë me dije se në vijim të veprimeve hetimore për këtë rast, specialistët për Hetimin e Krimeve të Komisariatit të Policisë Has arrestuan në flagrancë shtetasen:
S., 21 vjeçe, banuese në fshatin Pla, për veprat penale “Plagosja e rëndë me dashje” dhe “Plagosja e lehtë me dashje”.
Nga veprimet hetimore dyshohet se gjatë konfliktit për motive pronësie, kjo shtetase ka goditur me mjete të forta, shtetasit A. J., 65 vjeç dhe V. J., 60 vjeçe (bashkëshortë).
Shtetasi A. J. mori mjekim dhe është jashtë rrezikut për jetën, ndërsa shtetasja V. J. vijon të jetë në kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
