Ditën e sotme presidenti i Turqisë Erdogan tha se në fillim të shtatorit përkatësisht në datat 1dhe 2 Turqia do të kryejë stërvitje ushtarake në ujërat e Mesdheut lindor.
Sipas REL kjo deklaratë e Erdogan vjen një ditë pas lajmit se edhe Greqia do të zgjerohet me 12 milje në detin Jon dhe disa orë para mbledhjes së parlamentit në Greqi, ku pritet të ratifikohet një marrëveshje me Egjiptin, që përcakton kufijtë detarë midis dy vendeve, një hap për të cilin Turqia ka ngritur shqetësime.
Kujtojmë se dy vendet anëtare të Natos, Turqia dhe Greqia,kohëve të fundit janë përfshirë në një konflikt dhe tension që ka të bëjë me mosmarrëveshjet për kontrollin e ujërave mesdhetare lindore.
Tensionet u përshkallëzuan pasi Ankaraja dërgoi një anije për të kërkuar naftë dhe gaz në Detin Mesdhe.Ndërkohë është kërkuar edhe reagimi i Bashkimit Europian nga Greqia dhe Qiproja të cilat kundërshtojnë veprimin e Turqisë.
Ditën e djeshme edhe Franca pranoi të bashkohet në stërvitjet ushtarake me Italinë, Greqinë dhe Qipron në Mesdheun lindor.
