Këtë të hënë studentët janë rikthyer në Fakultetin e Drejtësisë për të zhvilluar mësim, por një grup tjetër ka penguar mësimin.
Përpjekjet e tyre për të hapur dyert dhe për të vazhduar mësimin kanë nxitur debate mes studenteve, madje disa vajza janë dhunuar nga grupi i të ngujuarve.
Njëra prej tyre është shprehur se e kanë goditur me karrige dhe me grushta, ndërsa një tjetër ka pësuar luhatje tensioni dhe është shoqëruar me ambulancë drejt spitalit.
I pranishëm gjatë debateve ka qenë edhe Rektori i Fakultetit, i cili i ka thënë edhe studentëve që kërkojnë mësim, si edhe grupit që ka vendosur bojkot që kanë të drejtë duke mos i dhënë situatës zgjidhje konkrete.
Studentët që duan mësim, pasi nuk kanë gjetur zgjidhje as nga rektori, i janë drejtuar dekanit të Fakultetit të Drejtësisë, Artan Hoxha.
Pas kërkesës së studentëve për të vijuar mësimin, dekani Hoxha i ka çuar një kërkesë ministrisë së Arsimit për t’i mundësuar ambiente për të zhvilluar mësimin.
“Duam ambiente të tjera për të zhvilluar mësimin. Procesi mësimor sa vjen dhe bëhet më i vështirë për tu bërë i plotë. Rektori nuk na është përgjigjur, unë kam folur me ministren e Arsimit. Unë shpresoj që të fillojmë që nesër mësimin, ska rëndësi se ku. Besoj që ministria do të na vijë në ndihmë. Ka persona që nuk janë as student. Nuk e di pse janë aty dhe prej kujt. Po ta dija, do ta thoja,” – tha gjatë një konferencë për shtyp dekani.
