Komsionieri për të Drejtën e Informimit dhe Mbrojtjen e të Dhënave Personale ka gjobitur titullarin e Agjencisë së Trajtimit të Koncesioneve (ATRAKO) pasi institucioni nuk ka përditësuar të dhënat që lidhen me Programin e Transparencës.
Një monitorim që ka nisur si rutinë nga ana e Komsionerit duket se është shndërruar në një mision të pamundur për faktin se nga ana e institucionit që ka përgjegjësinë e Koncesioneve nuk është reflektuar në asnjë rast.
Konkretisht në vendimin e bërë publik raportohet se gjatë muajit nëntor 2023 “Zyra e Komisionerit monitoroi faqen zyrtare të Autoriteti Publik http://atrako.gov.al/ në përfundim të të cilit rezultoi se Autoriteti Publik nuk ka përmbushur detyrimin ligjor të përcaktuar në nenin 4, nenin 6 dhe nenin 7 të LDI, për të vendosur në zbatim programin institucional të transparencës sipas Urdhrit nr. 187, datë 18.12.2020 “Për miratimin e Programit të Transparencës të Rishikuar”, i ndryshuar, të Komisionerit për të Drejtën e Informimit dhe Mbrojtjen e të Dhënave Personale, në të cilin përcaktohen kategoritë e informacionit që bëhen publik pa kërkesë”.
Nga monitorimi i kryer Komisioneri nënvizon se në faqen zyrtare të Autoritetit Publik gjendet i publikuar programi institucional i transparencës sipas modelit të miratuar nga Komisioneri, por informacioni sipas fushave dhe rubrikave pjesë përbërëse e tij nuk është i përditësuar.
Për këtë me një shkresë ATRAKO i është kërkuar që të bëjë përditësimin e informacionit sipas kërkesave ligjore që lidhen me transparencën duke i bërë të njohur se një monitorim i ri do të zinte vend në fund të nëntorit.
“Zyra e Komisionerit njoftoi Autoritetin Publik se duke nisur nga data 27 nëntor 2023, do monitorojë sërish faqen zyrtare të tij duke vijuar me procedurën e hetimit administrativ, në përputhje me nenet 18 dhe 19 të LDI.
Pasi është ri-monitoruar faqja zyrtare e autoritetit publik, është konstatuar se Autoriteti Publik nuk ka bërë përditësimin me informacion dhe dokumentacion të Programit të Transparencës” thuhet në vendim.
Pas kësaj sërish nga ana e Komsionerit u zhvillua një seancë dëgjimore në të cilën kërkohej pjesdëmarrja e titullarit të ATRAKO, Emiliano Gjika. Në këtë seancë ky i fundit nuk mori pjesë.
“Deri në datën e nxjerrjes së këtij vendimi, rezulton se Autoriteti Publik nuk ka bërë të mundur aksesimin dhe publikimin e kategorive të informacionit të programit institucional të transparencës sipas parashikimeve të LDI.
Programi i Transparencës përfaqëson instrumentin kryesor të transparencës. Çdo autoritet publik, përgatit paraprakisht, në formate lehtësisht të kuptueshme dhe të aksesueshme, si dhe vënë në dispozicion të publikut në faqen e tyre në internet kategoritë e informacionit të përcaktuara në nenin 7 të LDI. Nga monitorimi i zhvilluar nga Zyra e Komisionerit dhe hetimi i thelluar më pas, rezultoi se Autoriteti Publik nuk e ka përmbushur detyrimin e tij ligjor, si dhe nuk paraqiti asnjë argument apo provë për të arsyetuar mospërmbushjen dhe mos respektimin e dispozitave të LDI” thuhet në vendim.
Gjendur në këto kushte Komsioneri ka gjobitur titullarin me një vlerë 25 mijë lekë ndërkohë që ka kërkuar sërish plotësimin e detyrimeve që lidhen me transparencën./N.Maho/MONITOR
