Akuzat për afera korruptive, të Arben Ahmetajt ndaj disa prej eksponentëve të qeverisë ka krijuar kaos dhe po lëvizet çdo gur për t’i shpëtuar SPAK-ut. Për të vënë në kontroll organin e posaçëm të akuzës që të mos “prekë” vartësit e tij, kreu i qeverisë vendosi në komisionin e Posaçëm Fatmir Xhafën.
Ish-ministri i Drejtësisë, ish-ministri i Brendshëm dhe ish-kryetari i Reformës në Drejtësi nga foltorja e kuvendit pak ditë më parë i kërkoi me tone të ashpra prokurorisë speciale të krijuar nga SHBA që të mos hetojë zyrtarët e lartë e familjarët e tyre, emrat e të cilëve kanë dalë në dosje me akuza të rënda për korrupsion.
Ky sulm duket se u bashkë “orkestrua” në thelb nga të dyja palët. Me 106 vota pro, dy kundër dhe asnjë abstenim deputetët socialistë dhe demokratë votuan ndryshimet në Kodin Zgjedhor që u dakordësua mes PS dhe PD që i hap rrugë votës së Diasporës.
Kështu, me formulën e re për shpërndarjen e mandateve dy partitë e mëdha PS-PD ndryshe nga sa premtuan, forcuan vullnetin e kryetarit në hartimin e listës pasi plot 100 deputetë do emërohen prej tyre. Diskutimet e këtyre ndryshimeve u shoqëruan me debate e kundërshti.
Me këtë lëvizje, PD dhe PS bashkuan forcat për një pseudoreformë dhe nuk përjashtojnë mundësinë që 106 votat “pazare” të ndryshojnë Kushtetutën. Një “komplot” i mirëfilltë politik me anë të së cilës synohet kontrolli i zgjedhjeve e më pas “rrëzimi i SPAK”, të dyja në një lëvizje.
Edhe gjatë seancës së parlamentit, Xhafaj e artikuloi qartë se “ne duhet ta konsolidojmë më tej sistemin e ri të drejtësisë në binarin kushtetues mbi të cilin është ndërtuar”. Për fat të keq opozita, po konsolidon pozicionet e saj në rrugën e kryeministrit e tashmë shqetësimi i tyre kryesor është si të heqin “qafe” SPAK-un.
Vula opozitë-qeveri kundër Prokurorisë së Posaçme, iu vu me fjalimin mbyllës, të kryetarit të komisionit, Fatmir Xhafa i cili paralajmëroi me kërcënim të hapur Altin Dumanin, që të mos hetojë asnjë aferë e krim që denoncojnë mediat e qytetarët, ndryshe do përballen me pasoja.
Gazeta Reforma
