Të dhëna të bëra publike së fundmi, lidhur me kompanitë ajrore që operojnë në vendin tonë kanë nxjerrë në pah problematikat e linjës “Wizz Air”, ku shifrat rekord për periudhën janar-dhjetor 2023 faktojnë vonesat, anulimet dhe ankesat e shumta të qytetarëve. Nga të dhënat rezulton se Wizz Air është kompania që ka numrin më të madh të vonesave mbi 3 orë përgjatë vitit 2023, me një koeficent 26.7 për 1 mijë fluturime. Sa i përket anulimeve, Wizz Air është në vendin e dytë me një koeficent 4.9 për 1 mijë fluturime, në vendin e parë është kompania Lufthansa me 5.2, e ndjekur nga Air Albania me 2.5.
Me datë 3 Tetor fluturimet vazhdojnë të jenë problematike, madje avioni që pritej të vinte nga Hahn i Gjermanisë ka mbërritur në tokën shqiptare 2 orë me vonesë duke sjellë kështu problematika, lodhje dhe ankesa të shumtë nga qytetarët që ishin në avion.
Gazeta Reforma e ka ngritur disa herë problematikën e shfaqur nga kompanitë ajrore me zvarritjen e procedurave, vonesat e fluturimeve, mungesën e korrektësisë, anulimet e fluturimeve dhe deri në moskompensimin e udhëtarëve. Në redaksinë tonë kanë mbërritur denoncime lidhur me kompaninë Wizz Air, raste këto të cilat janë bërë publike nga ana jonë. Ky raport i fundit konfirmon edhe njëherë mungesën e seriozitetit deri në abuzim me besimin e qytetarëve dhe biznesin.
