Përhapja e Coronavirusit me shpejtësi të madhe përtej kufijve të Kinës ka bërë që shumë vende të marrin masa për të mos lejuar kthimin e virusit në një pandemi.
Coronavirusi, OBSH bën thirrje: Të bëhemi gati, bota rrezikon një pandemi”
Pas thirrjes së OBSH për gatishmëri globale, ditën e djeshme Bashkimi Europian premtoi 230 milionë euro me qëllim për të luftuar kundër virusit të rrezikshëm.
Po ashtu, SHBA ka premtuar 2.5 miliardë dollarë, nga të cilat 1 miliardë do jepen për vaksinën e nevojshme për të luftuar virusin, ndërsa 1.5 miliardë dollarë për pajisje mjekësore.
Së fundmi, mediat e huaja shkruajnë se një kompani farmaceutike nga Cambridge, Massachusetts, pretendon se është afër krijimit të vaksinës kundër Coronavirusit.
Kompania në fjalë ka bashkëpunuar me Niad (Instituti Kombëtar i Alergjisë dhe Sëmundjeve Infektive) dhe Qendër e Hulumtimit të Vaksinave (Vrc), ndërsa testet janë zhvilluar në uzinën Norwood, 40 kilometra në jug të Bostonit.
Sipas tyre, kjo vaksinë është gati për t’u testuar tek njerëzit, ndërkohë disa vaksina eksperimentale nga Norwood janë dërguar tek Instituti Kombëtar i Alergjisë dhe Sëmundjeve Infektive (Nih) në Bethesda, Maryland.
Provat klinike pritet të fillojnë së shpejti, ku do testohen 20-25 vullnetarë të shëndetshëm, duke kontrolluar nëse dy doza të vaksinës janë të sigurta dhe do të shkaktojnë një përgjigje imune.
Rezultatet mund të jepen midis muajit korrik ose gusht dhe vaksina mund të dalë në treg vetëm në vitin 2021.
Deri më tani Coronavirusi ka vrarë të paktën 2700 persona, teksa janë prekur më shumë se 80 mijë të tjerë në rang botëror.
Situata më e rënduar paraqitet në Kinë, vendi ku lindi virusi, ndërsa gjendja është serioze edhe në Korenë e Jugut dhe Itali.
Në Itali kanë vdekur 7 persona dhe janë prekur të paktën 230 të tjerë, ndërsa në Korenë e Jugut janë 830 të prekur.
