Kombëtarja Shqiptare është mundur 4-1 në Poloni, në sfidën që ishte e vlefshme për kualifikueset e Botërorit 2022. Ndonëse bënë një lojë mjaft të mirë, kuqezinjtë nuk arritën që të fitonin.
Pjesa e parë përfundoi me fitoren e vendasve 2-1. Fillimisht kaloi në avantazh Lewandowski, pas një goditje me kokë në minutën e 12’. Një aksion i vetëm dhe goleadori polak nuk fal, duke mos i dhënë asnjë mundësi portierit Berisha.
Por avantazhi i Polonisë zgjati vetëm 12 minuta, pasi ishte Sokol Cikalleshi, pasi ka marrë një top brenda zone, u kthye dhe goditi pa u menduar, duke mposhtur Szczesny, i vendosur keq dhe jo pa faj.
Por pjesa e parë nuk u mbyll me barazim pasi në minutën e 44’ vjen goli i dytë i vendasve, me autor Buksa. Për të ardhur keq, pasi kuqezinjtë po luanin vërtet mirë.
Kuqezinjtë hidhen menjëherë në sulm në pjesën e dytë, por polakët ndëshkojnë në minutën e 50-të me anë të një kundërsulmi. Lewandowski bën gjithçka mirë në krah dhe në fund pason për Krychoëiak, i cili nuk fal afër portës. Reja freskon sulmin, por në fund janë sërish vendasit që shënojnë me Linetty. Vlen për t’u veçuar një episod në minutën e 65-të kur Manaj kërkoi penallti, por gjyqtari nuk e pa as në VAR rastin e dyshimtë. Pas kësaj humbje qëndrojmë në kuotën e 6 pikëve. Pavarësisht një loje të mirë nga kuqezinjtë ndeshja mbyllet 4-1 për Poloninë.
