Kolegji i Posaçëm i Apelimit ka shkarkuar përfundimisht ditën e sotme nga detyra, ish-gjyqtarin e apelit të Shkodrës, Luan Dervishin. Në vitin 2018, ishte Komisioni i Pavarur i Kualifikimit që vendosi për shkarkimin e Dervishit, pasi ky i fundit rezultoi që kishte kontakte me botën e krimit të organizuar.
Gjatë seancës dëgjimore për Dervishin relatorja bëri me dije një listë të gjatë mospërputhjesh në deklarime dhe mungesë të burimeve të ligjshme për pasurinë e gjyqtarit Dervishi.
Ndërkohë DSIK kishte dërguar dy raporte për Dervishin: i pari me konstatimin “i përshtatshëm”, dhe më pas pas informacionit nga Shërbimi Informativ Shtetëror i dha KPK-së një raport “papërshtatshmërie”. Dervishi i kundërshtoi akuzat.
Njoftim vendimi
Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Sokol Çomo relator, Albana Shtylla, Ina Rama, Natasha Mulaj anëtarë, shpalli vendimin për çështjen (JR) nr.11/2019, datë 21.02.2019, që lidhet me ankimin e subjektit të rivlerësimit Luan Dervishi, kundër vendimit nr. 83, datë 26.11.2018 të Komisionit të Pavarur të Kualifikimit. Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 83, datë 26.11.2018 të Komisionit të Pavarur të Kualifikimit, që i përket subjektit të rivlerësimit Luan Dervishi. Ky vendim është përfundimtar dhe ka efekt të menjëhershëm. U shpall në Tiranë, më datë 01.10.2020.
/GazetaReforma.com/
