Sasia e kokainës së sekuestruar ditën e sotme në portin e Durrësit është 11 kg e 675 gr. Ajo ishte fshehur një një kontenjer me banana që vinte nga Ekuadori. Droga ishte e vendosur në impiantin e kondicionerit dhe ishte ambalazhuar në 14 pako. Ngarkesa kishte mbërritur dy ditë më parë dhe policia e kishte mbajtur nën vëzhgim. Teksa shoferi ka mbërritur për ta tërhequr, ka ardhur edhe ndërhyrja e policisë.
Një person është arrestuar deri tani dhe bëhet fjalë për Bajron Gumenin. Ky i fundit është vëllai nga nëna i Eduart Dautit, administratori i kompanisë “Alba Exotic Fruit”. Personi i dytë i ndalur, që ishte edhe jurist ii kompanisë, u la i lirë.
Ndërkohë, lidhur me rastin ka reaguar edhe ministri i Brendshëm Bledi Çuçi. Në një postim në Facebook ai shkruan se sasia e kokainës së kapur në portin e Durrësit në katër muajt e fundit, ka shkuar në 1 ton. Sipas Çuçit kjo është dëshmi e aftësisë zbuluese të Policisë së Shtetit.
Reagimi i plotë:
Faktet flasin vetë. Pas operacionit të sotëm shkon në rreth 1 ton sasia e lëndës narkotike e llojit kokainë e kapur në Portin e Durrësit gjatë katër muajve të fundit. Asgjë nuk është e rastësishme, por dëshmi e luftës pa kompromis kundër krimit të organizuar dhe e aftësisë zbuluese e goditëse të Policisë së Shtetit. Këto operacione dëshmojnë gjithashtu besimin e lartë të partnerëve tanë ndërkombëtarë në hetimet e përbashkëta, intensive dhe profesioanle, në goditjen e rrjeteve të trafikut të drogës. Kjo është një luftë e vazhdueshme, që nuk nis e as përfundon me një operacion. Ne do të vijojmë punën me Policinë e Shtetit dhe të gjitha agjencitë e tjera ligjzbatuese, brenda e jashtë vendit, për ta bërë Shqipërinë një vend më të sigurt.
