Nga viti 2022 deri në vitin 2025, qeveria ka planifikuar të investojë 3,6 miliardë euro nga buxheti i shtetit përafërsisht gati 1 miliard euro në vit. Zgjerimi fiskal do të vijojë duke e mbajtur zërin e investimeve kapitale mbi kufirin e sugjeruar nga FMN prej 5% të Prodhimit të Brendshëm Bruto (PBB).
Lidhur me këtë shifër të lartë në funksion të borxhit public ka reaguar presidenti I vendit Ilir Meta I cili i bën thirrje dKuvendit dhe institucioneve financiare vendase dhe të huaja, për të bërë sa më parë një vlerësim real dhe transparent të borxhit publik duke përfshirë të gjitha detyrimet aktuale dhe ato të pritshme të Republikës së Shqipërisë.
Sipas Metës “koha e gallatës me ekonominë dhe taksat e shqiptarëve” duhet të jetë një epokë e shkuar.
“E përshëndes reagimin e përgjegjshëm dhe profesional të ekspertëve vendas të ekonomisë për nivelin tepër shqetësues të borxhit publik.
Duke vlerësuar situatën kritike, për të parandaluar një humnerë ekonomike e financiare, si dhe drama të mëtejshme sociale, përsëris thirrjen drejtuar Kuvendit dhe institucioneve financiare vendase dhe të huaja, për të bërë sa më parë një vlerësim real dhe transparent të borxhit publik duke përfshirë të gjitha detyrimet aktuale dhe ato të pritshme të Republikës së Shqipërisë. Koha e gallatës me ekonominë dhe taksat e shqiptarëve duhet të marrë fund! Ekonomia nuk mund të lihet më në dorën e aventurierëve, që duan të falimentojnë Shqipërinë!”, shkruan Meta.
