Kontrollit të Lartë të Shtetit do të auditojë koncesionet Partneritet Publik Privat, deklaron kryetari i KLSH-së, Arben Shehu. Në një takim që zhvilloi me ambasadorin e Zvicrës në Shqipëri ai e ka vënë theksin në zhvillimin e auditimeve në nivel të lartë profesional në kuadër të projektit SECK për PPP-të në Shqipëri.
Objektivi kryesor i këtij projekti është rritja e kontributit të KLSH për të forcuar llogaridhënien qeveritare dhe transparencën në përdorimin e fondeve publike, përmes auditimeve më profesionale dhe gjithëpërfshirëse të koncesioneve dhe partneriteteve publik-privat.
Gjatë fjalës së tij zoti Maître vlerësoi hedhjen e hapave të para të këtij projekti duke nënvizuar se institucionet efektive të një shteti efiçient janë parakusht i një ekonomie të qëndrueshme, rritjes së qëndrueshme dhe të përhapjes së prosperitetit.
“Si partner zviceran, ne do të vazhdojmë të mbështesim KLSH-në me ekspertizë teknike si pjesë e mbështetjes së madhe që Zvicra ka dhënë me asistencë për menaxhimin e financave publike ku përfshihet: menaxhimi i borxhit, administrimi i taksave, kontabiliteti publike, statistikat financiare dhe financat vendore, pasi gjykojmë se një mbikëqyrje efektive e financave publike e plotëson dhe e përsos këtë cikël të rëndësishëm të administrimit publik në Shqipëri”, u shpreh z. Maître.
Kryetari i KLSH, shprehu vlerësimin e institucionit për vizitën dhe për më tepër për ndihmën e rëndësishme që shtetit zviceran jep ndaj vendit tonë.
Zoti Shehu shprehu vullnetin për angazhim maksimal për t’i dhënë tonin e duhur institucional të gjithë proceseve audituese dhe shprehu sigurinë se KLSH do të jetë garant i ruajtjes së ligjit. Koncesionet PPP janë konsideruar problematike jo vetëm nga opozita, por dhe prej institucioneve ndërkombëtare.
Fondi Monetar Ndërkombëtar në raporte ka theksuar se koncesionet e hartuara keq kanë rrezik të lartë që rrisin detyrimet dhe dëmtojnë eficencën e investimeve publike. Po ashtu shtohet se përmes tyre mund të cenohet qëndrueshmëria fiskale dhe e borxhit
/GazetaReforma.com/
