Këshilli i Lartë Gjyqësor ka vendosur të pranojë pjesërisht kërkesën e Inspektorit të Lartë të Drejtësisë për procedim disiplinor ndaj gjyqtares Arta Llazari, e cila ushtron detyrën pranë Gjykatës së Shkallës së Parë në Shkodër.
Si rezultat, gjyqtarja është pezulluar nga detyra për një periudhë prej gjashtë muajsh.
Hetimi ndaj saj nisi pas 11 ankesave për vonesa në arsyetimin e vendimeve gjyqësore dhe neglizhencë në trajtimin e çështjeve civile.
ILD kishte kërkuar shkarkimin e saj, duke argumentuar se këto shkelje kishin dëmtuar procesin e drejtësisë dhe kishin cenuar besimin e publikut te sistemi gjyqësor.
Gjatë hetimeve u zbuluan raste të shumta ku çështjet nuk ishin trajtuar për mbi tre vite, ndërsa për vitet 2022 dhe 2023, 90% e çështjeve civile të themelit kishin tejkaluar afatin ligjor për dorëzimin e vendimeve.
Këto vonesa konsiderohen si shkelje e të drejtës së qytetarëve për një proces të rregullt dhe të drejtë gjyqësor.
Veprimet e gjyqtares u cilësuan si të pakujdesshme dhe të dëmshme për ecurinë e procedurave gjyqësore dhe imazhin e drejtësisë. Për këtë arsye, KLGJ vendosi pezullimin e saj për gjashtë muaj, duke mos pranuar kërkesën për shkarkim të plotë.
