Kryekomisari Asllan Shytaj, i ftuar në emisionin “Now” me Erla Mëhillin, dha një panoramim të detajuar të ngjarjes së rëndë që lidhet me atentatin ndaj 27-vjeçarit Klajdi Prendi, djali i ish-gjyqtarit Fran Prendi.
Sipas Shytajt, atentatori e ka qëlluar Klajdi Prendin brenda automjetit të tij, dhe më pas, viktima është dërguar në spital me mjete të rastit nga disa persona të pranishëm në momentin e ngjarjes.
Kryekomisari Shytaj sqaroi se pas njoftimit të marrë nga qytetarët, që informonin për një goditje me armë zjarri në afërsi të lokalit “Artistit”, është ngritur menjëherë grupi hetimor dhe janë realizuar veprimet hetimore.
Gjatë hetimit janë sekuestruar prova të rëndësishme, përfshirë pamje filmike dhe shtatë gëzhoja të kalibrit 9 milimetra.
Po ashtu, u konfirmua se mjeti i viktimës ishte goditur disa herë, kryesisht në derën e shoferit dhe xhamin e tij.
Përveç kësaj, Shytaj bëri të ditur se pas hetimeve është gjetur arma e krimit, e cila ishte lënë brenda mjetit të djegur të autorëve, dhe se arma ishte dëmtuar gjatë djegies së automjetit.
