Kryeministri Edi Rama ka bërë thirrje për njohjen e Kosovës gjatë fjalës së tij në Asamblenë e OKB. Rama ka thënë se ky nuk është një obsesion, por ftesë për të njohur realitetet e reja në zemër të Evropës, në Ballkanin Perëndimor, ku lindi një shtet i ri me ndihmën e bashkësisë ndërkombëtare. Rama tha se kjo asamble nuk mund të jetë e plotë pa Kosovën dhe tha se Shqipëria mbështet dialogun mes Kosovës dhe Serbisë, si e vetmja mundësi që mund të sjellë njohjen mes dy shteteve.
“Megjithatë, kjo Asamble e madhe nuk do të jetë e plotë pa një prej shteteve të rajonit tonë, Republikën e Kosovës. Më keni dëgjuar më shumë se njëherë këtu të bëj thirrje për njohjen e Pavarësisë së Kosovës. Nuk është obsesion, por ftesë për të njohur realitetet e reja në zemër të Evropës, në Ballkanin Perëndimor ku një shtet i ri lindi me ndihmën e bashkësisë ndërkombëtare. Kjo punë duhet të përfundohet. Dua ta theksoj, ta përsëris thirrjen, sepse realiteti na ka treguar neve, kosovarëve, serbëve, të gjithë ballkanasve, se një Kosovë e pavarur, e sovrane, është një realitet që vazhdon prej 13 vitesh dhe ka sjellë shumë paqe në rajon, ka kontribuar që të shkëputemi nga e shkuara e hidhur.
Është pjesë e së ardhmes së përbashkët të Ballkanit Perëndimor. Shqipëria mbështet si alternativë të vetme dialogun mes Kosovës dhe Serbisë, si e vetmja mundësi për të sjellë njohjen e ndërsjellë mes dy shteteve. E them me bindje absolute, vetëm maturia, kurajoja dhe vizioni do ta lejojë më në fund Serbinë të heqë barrën e së shkuarës”, tha Rama.
