Gjykata e Korçës ka caktuar sot masën e sigurisë “arrest me burg në mungesë” për Kejsi Spahillarin, si e dyshuar në vrasjen e Antonio Karafilit, ngjarje që ndodhi shtatë vjet më parë në Voskopojë. Antonio Karafili u gjet i varur në një pemë pranë këtij fshati.
Sipas prokurorisë, prova biologjike tregojnë se Kejsi Spahillari dhe Rexhep Vathi mbyturën Antonio Karafilin me një çarçaf dhe më pas e varën në pemë për të inskenuar vetëvrasjen.
Motivi i dyshuar për këtë krim lidhet me një lidhje paralele që Kejsi kishte me të dy, viktimën dhe Rexhep Vathin. Pas ngjarjes, Kejsi emigroi në Kanada, ndërsa Rexhep Vathi vrau veten në gusht të vitit 2024.
Në lidhje me këtë ngjarje, ka reaguar edhe e ëma e Kejsi Spahillarit, e cila ka mohuar akuzat ndaj vajzës së saj. Ajo theksoi se Kejsi nuk është vrasëse dhe se ajo dhe Antonio kishin pasur një grindje para ngjarjes. Sipas saj, pas grindjes, 18-vjeçari kishte shkuar në Voskopojë dhe kishte refuzuar të zbresë, ndërsa kur e ëma dhe vëllai i tij kishin shkuar për ta marrë, e gjetën të vdekur.
“Çdo gjë është një sajesë. Historia që thonë nuk është ashtu siç ka ndodhur. Unë e di çfarë ka ndodhur. Kejsi nuk ka lidhje me këtë ngjarje. Ata kishin pasur një grindje në Korçë dhe kishin shkuar në Voskopojë. Ai nuk kishte dashur të zbriste dhe Kejsi e la atje dhe priti që ai të vinte. Kur ata shkuan për ta marrë, e gjetën të vdekur. Kejsi më mori në telefon, duke ulërirë, dhe më tha që ata e kishin gjetur. Nuk ka mundësi që të shpikohet një histori e tillë pa asnjë provë konkrete. Kërkoj drejtësi, sepse Kejsi nuk është vrasëse,” tha e ëma e Kejsi Spahillarit.
