COVID-19 vijon të përhapet me shpejtësi dhe të thellojë bilancin e viktimave dhe të prekurve në rang botëror, pasi deri tani janë shënuar 39,469 viktima dhe 405,377 të infektuar, teksa 172,436 persona janë shëruar në 201 shtete.
Ndonëse situata në Kinë u përmirësua ndjeshëm dhe kinezët po i riktheheshin jetës normale, duket se COVID-19 nuk do tërhiqet nga origjina, pasi rastet e reja në Kinë po rriten sërish.
79 raste të reja me koronavirus janë raportuar gjatë orëve të fundit, të gjithë këto raste ishin të importuara, dhe kjo i dha fund 4 ditëve me zbritje, teksa shifrat tregojnë një ndryshim të trendit të mbajtur gjatë ditëve të fundit pasi të enjten u raportuan 67 raste, të premten 55, të shtunën 54, të dielën 45 dhe 31 të hënën.
Në provincën Hubei nuk ka pasur raste të reja edhe pse një pacient ndërroi jetë në Wuhan ku nisi pandemia, por sipas të dhënave të pasqyruara nga Komisioni Kombëtar i Shëndetit deri më tani nuk kanë gjetur raste të transmetimit lokal të virusit.
Ekspertë të ndryshëm kanë shprehur shqetësimin se epidemia në Kinë mund të kthehet sërish me vizitorë që mund ta sjellin pas hapjes së kufijve dhe kjo duket qartë edhe nga fakti që pothuajse të gjitha rastet e reja të konfirmuara janë të inportuara.
Tashmë priten vendimet që do marrë qeveria rreth kësaj situate, pasi rikthimi i koronavirusit në Kinë do ishte fatal.
