Lojtari i Gjermanisë, Joshua Kimmich, ka shprehur entuziazmin dhe vendosmërinë e tij para ndeshjes së çerekfinales së Europianit kundër Spanjës. Mesfushori i Bayern Munich e konsideron këtë përballje si një finale të parakohshme, duke theksuar se këto ndeshje janë të një niveli shumë të lartë dhe janë ato që çdo lojtar dëshiron të luajë.
“Si lojtar jam me të vërtetë i motivuar pasi ndeshje si këto janë të një niveli shumë të lartë,” tha Kimmich. Ai theksoi se Spanja ka qenë një rivale e denjë për Gjermaninë në vitet e fundit, duke i mundur në më shumë se një rast. Për Kimmich, këto sfida të kaluara janë një motiv shtesë për të synuar fitoren në këtë Europian.
“Nëse kërkon të fitosh turneun, atëherë nuk mund ta bësh pa mundur Spanjën. Ne duam që ta mundim dhe të fitojmë kupën. Ky është objektivi ynë. Duam që të fitojmë Europianin që të shkruajmë një tjetër kapitull të lavdishëm në historinë e Federatës Gjermane të Futbollit,” tha ai, duke shprehur ambicien e tij për të sjellë suksesin në Gjermani.
Kimmich gjithashtu theksoi rëndësinë e kontrollit të topit dhe lojës dinamike kundër Spanjës. “Edhe Spanja ashtu si ne kërkon të ketë topin nën kontroll. Kundër Spanjës duhet të luash me dinamizëm, kurajë dhe shumë fuqi. Shpresojmë shumë që edhe fansat të na ndihmojnë, edhe pse përgjegjësia është e jona pasi ne zbresim në fushë,” përfundoi ai, duke kërkuar mbështetjen e tifozëve për këtë sfidë të madhe.
Ndeshja pritet të jetë një spektakël i vërtetë, ku dy nga skuadrat më të forta të Europës do të përballen për një vend në gjysmëfinale.
