Nga qyteti i Durresi, ku ishte këtë pasdite për vëzhgimin e procesit zgjedhor, ambasadorja e SHBA, Yuri Kim, tha se pjesëmarrja e lartë në zgjedhje tregon se qytetarëve shqiptarë iu intereson vendi i tyre.
Mes të tjerash, ambasadorja Kim iu bëri thirrje kandidatëve për deputetë dhe drejtuesve politikë, që të presin për rezultatin e zgjedhjeve, pra të presin gjykimin e qytetarëve.
“Kemi parë pjesëmarrje të lartë. Kjo tregon se Qytetarëve shqiptarë iu intereson vendi i tyre. Janë raportuar disa incidente dhe është përgjegjësi e autoriteteve të hetojnë këto incidente. Ne e kemi bërë shumë të qartë që të hetohen çështjet deri në fund.
Qytetarët janë duke përmbushur detyrën e tyre. Autoritetet janë duke bërë detyrën e tyre. Tani ka ardhur koha që kandidatët dhe drejtuesit politikë të presin për rezultatet dhe të presin gjykimin e popullit”, tha ambasadorja Yuri Kim mes të tjerash.
Dita e votimeve në Shqipëri ka nisur sot në orën 07:00 dhe qytetarët do të kenë mundësi të votojnë deri në orën 19:00. Risia në këto zgjedhje është identifikimi elektronik i qytetarëve, që kursen shumë kohë. Por dhe këto pajisje, nuk kanë funksionuar siç duhet në disa pika votimi. Pjesëmarrja në votime është disi më e lartë se në vitin 2017.
