Kryedemokrati Lulzim Basha në një deklaratë që ka zgjatur jo më shumë se 10 sekonda, ka dhënë përgjigjen e tij për marrëveshjen e arritur për Reformën Zgjedhore të bërë me dije më herët nga ambasadorja Kim.
Kreu i PD-së në fjalën e tij për gazetarët e mbledhur në selinë blu bëri me dije se ka dakordësi mes palëve për Reformën Zgjedhore, por se ka ende një çështje të pazgjidhur.
Gjithashtu Basha siguroi shqiptarët se opozita e bashkuar jashtëparlamentare do të bëjë gjithçka për zgjedhje të lira dhe të ndershme.
“Është bërë progres drejt dakordësisë për administratën zgjedhore, ka mbetur një çështje pa zgjidhur. Dua t’i siguroj shqiptarët se opozita e bashkuar do të bëjë gjithçka për zgjedhje të lira dhe të ndershme,”-tha Basha.
Mbrëmjen e sotme, në një deklaratë për mediat, ambasadorja amerikane iu tha shqiptarëve se ka një marrëveshje për Reformën Zgjedhore duke iu drejtuar për një përgjigje kreut të PD.
Menjëherë pas largimit nga rezidenca e ambasadës së SHBA të Oerd Bylykbashit dhe Rudina Hajdarit, Kim ka dalë së bashku me ambasadorin e BE-së Luigi Soreca dhe ambasadorin britanik Duncan Norman ku falënderoi të gjitha palët, duke i njohur merita të veçanta maxhorancës.
