Disa shpërthime të forta u dëgjuan në kryeqytetin ukrainas të martën, ndërsa qyteti ishte nën një shtetrrethim 35-orësh.
Një nga shpërthimet ishte aq i fortë sa ndezi alarmet e makinave në qendër të qytetit, dëshmoi një ekip i CNN në Kiev.
Këshilltari i Ministrisë së Brendshme të Ukrainës, Anton Gerashchenko tha se mbrojtja ajrore ukrainase kishte shkatërruar një raketë ruse Tochka-U dhe se mbetjet e predhës kishin rënë në lumin Dniper.
Bombardime dhe të shtëna me armë të vogla mund të dëgjoheshin gjithashtu me ndërprerje gjatë dy orëve të fundit.
Kyiv është aktualisht nën një shtetrrethim të shpallur nga kryetari i bashkisë së qytetit, Vitali Klitschko të hënën. Në një deklaratë në Telegram, Klitschko tha se shtetrrethimi do të fillojë të hënën në orën 20:00 dhe do të zgjasë deri në orën 7:00 të mëngjesit të së mërkurës.
“Dyqanet, farmacitë, pompat e benzinës, institucionet nuk do të punojnë”, tha ai. “Prandaj, u kërkoj të gjithëve të qëndrojnë në shtëpi ose në strehimore – në tingullin e alarmit. Vetëm ata me leje të veçanta do të mund të lëvizin nëpër qytet.”
Klitschko theksoi se shëtitja nëpër qytet pa një leje të posaçme do të jetë e ndaluar, me përjashtim të rasteve kur shkohet në strehimore.
“Kryeqyteti është zemra e Ukrainës dhe do të mbrohet”, shtoi kryebashkiaku i Kievit.
Në ditën e 20-të të sulmeve të Rusisë në Ukrainë, predha artilerie goditën të martën herët apartamente në Kiev duke shkaktuar të paktën 2 të vdekur.
Ushtria ruse filloi një ofensivë në Ukrainë më 24 shkurt (2022).
