Bert Kuliçi dhe Elona Alvora janë dy prokurorët e Vlorës që garojnë për anëtarë të Këshillit të Lartë të Prokurorisë (KLP). Gjithsej në garë janë 5 prokurorë. Dy nga prokuroria e Vlorës, një nga Durrësi, një nga Berati e një nga Tirana.
Emrat
Kjo rezultoi nga gara për vakancat në Këshillin e Lartë të Prokurorisë (KLP) pas shkarkimit nga Vettingu të dy anëtarëve, Besnik Cani dhe Arben Dollapaj.
Brenda javës pritet që Prokuroria e Përgjithshme të nxjerrë datat e votimit sipas prokurorive.
Cani u shkarkua nga posti i prokurorit për shkak të problemeve me pasurinë, vendim i Kolegjit të Posaçëm të Apelimit çka solli edhe humbjen e mandatit si anëtar KLP-je.
Për të njëjtin shkak, për probleme me pasurinë u shkarkua edhe Arben Dollapaj.
Plotësimi i vakancave ishte parashikuar që të bëhej që në nëntor, por Prokuroria e Përgjithshme pezulloi aplikimet pas urdhrit të Komitetit Teknik të Ekspertëve për të ndaluar grumbullimet në vende të mbyllura apo të hapura.
Këshilli i Lartë i Prokurorisë përbëhet nga 11 anëtarë, gjashtë prej të cilëve zgjidhen nga prokurorët e të gjitha niveleve të prokurorisë dhe pesë anëtarë zgjidhen nga Kuvendi, nga radhët e juristëve joprokurorë.
Sipas ligjit, anëtarët prokurorë përzgjidhen nga radhët e prokurorëve me integritet të lartë moral dhe profesional, sipas një procedure transparente dhe publike që siguron një përfaqësim të drejtë të të gjitha niveleve të prokurorisë.
Procedura e zgjedhjes
Anëtarët joprokurorë përzgjidhen nga radhët e juristëve të spikatur me jo më pak se 15 vjet përvojë pune në profesion, me integritet të lartë moral dhe profesional. Ata nuk duhet të kenë mbajtur funksione politike në administratën publike ose pozicione drejtuese në parti politike gjatë 10 vjetëve të fundit përpara kandidimit. Dy anëtarë joprokurorë zgjidhen nga radhët e avokatëve, dy anëtarë nga trupa e pedagogëve të fakulteteve të drejtësisë dhe të Shkollës së Magjistraturës, si dhe një anëtar nga shoqëria civile. Sekretari i Përgjithshëm i
Kuvendit, bazuar në një procedurë transparente dhe publike, shpall vendet vakante, sipas ligjit.
