Këshilli i Bashkimit Evropian ka miratuar konkluzionet për zgjerimin e Shqipërisë, ku theksohet nevoja për miratimin e legjislacionit dytësor për pakicat dhe angazhimin për të zbatuar me shpejtësi aktet nënligjore të ligjit të vitit 2017 për mbrojtjen e pakicave kombëtare, në përputhje me standardet evropiane. Po ashtu, theksohet rëndësia e zbatimit të reformave gjithëpërfshirëse në sektorin e tokës dhe konsolidimin e të drejtave pronësore në mënyrë transparente.
Këshilli gjithashtu nënvizon nevojën për të forcuar rolin e shoqërisë civile dhe për të zhvilluar konsultime kuptimplota me të gjitha palët e interesuara. Për reformat zgjedhore, Këshilli kërkon adresimin e rekomandimeve të pazgjidhura nga OSBE/ODIHR dhe Komisioni i Venecias në mënyrë gjithëpërfshirëse dhe në kohë.
Po ashtu, Këshilli vlerëson progresin e bërë për emigracionin dhe menaxhimin e kufijve, ndërkohë që kërkon përparim të mëtejshëm në procedurat e azilit dhe përafrim të politikave të vizave me Bashkimin Evropian.
