Ish-ministri i Mjedisit Lefter Koka, i akuzuar për korrupsion lidhur me çështjen e inceneratorëve, u la para pak ditësh në burg nga Gjykata e posaçme Kundër Krimit të Organizuar dhe Korrupsionit. Pas pak ditësh, Koka kërkoi masë më të butë sigurie, ndërsa u shpreh se nuk është i rrezikshëm.
Pas kërkesës së tij, Koka ka dalë sot para togave të zeza të Gjykatës së Posaçme të Apelit. Ndonëse sipas tij është një person që nuk ka rrezikshmëri shoqërore, dhe as mund të prishë ndonjë provë, Gjykata ka vendosur ta lërë në qeli ish-ministrin Koka, i cili akuzohet për abuzim dhe shpërdorim detyre në lidhje me aferën e inceneratorëve.
Kujtojmë që akuzat që rëndojnë mbi Kokën janë shpërdorim detyre, pastrim parash dhe korrupsion. Ndërkohë të akuzuar për këtë dosje dhe të shpallur në kërkim janë edhe dy biznesmenët Stela Gugallja dhe Klodian Zoto, ndaj të cilëve ka masë sigurie arrest në burg në mungesë. Ata akuzohen se kanë lëshuar fatura fiktive me vlerë 3.6 milionë Euro për punime që nuk janë kryer asnjëherë në incenerator.
Avokati mbrojtës i ish-ministrit, Fatmir Braka, tha se Lefter Koka është shprehur i pafajshëm në seancën gjyqësore. Madje arrestimin e klientit të tij e konsideron të befasishëm pasi nuk është marrë asnjëherë në pyetje. Ai theksoi se do ta apelojnë masën e sigurisë.
