Një 52-vjeçar është arrestuar në qytetin e Cërrikut, pasi ishte në kërkim ndërkombëtar me qëllim ekstradimi drejt Italisë.
Bëhet fjalë për Albano Kumen, ndaj të cilit autoritetet italiane kishin lëshuar urdhër-arrest për disa vepra të rënda penale.
Sipas burimeve zyrtare, Kume akuzohet nga drejtësia italiane për “dhunë seksuale”, “rrëmbim personi”, “vjedhje” si dhe “shkelje të rregullave për mbajtjen e armëve”. Ligji penal italian parashikon dënime të rënda për këto vepra, që shkojnë deri në 15 vite burg.
Arrestimi i tij është kryer nga strukturat e policisë shqiptare, në bashkëpunim me autoritetet ndërkombëtare, dhe tashmë kanë nisur procedurat për ekstradimin e tij drejt Italisë.
Njoftimi:
Policia e Shtetit
Finalizohet nga Drejtoria e Forcës së Posaçme Operacionale, operacioni policor i koduar “Operacionalja 56”. Kapet në Cërrik dhe arrestohet me qëllim ekstradimin në Itali, një 52-vjeçar në kërkim ndërkombëtar.52-vjeçari kërkohej nga autoritetet italiane, për disa vepra të rënda penale.
Strukturat e Drejtorisë së Forcës së Posaçme Operacionale, në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, finalizuan operacionin e radhës, të koduar “Operacionalja 56”. Në kuadër të këtij operacioni, në Cërrik, u bë i mundur lokalizimi, kapja dhe arrestimi i shtetasit A. K., 52 vjeç, banues në Cërrik.
Ky shtetas ishte shpallur në kërkim ndërkombëtar pasi autoritetet italiane kanë lëshuar urdhër arresti ndaj tij, për veprat penale “Dhuna seksuale”, “Rrëmbim personi”, “Vjedhja” dhe “Shkelja e rregullave për armët”. Për këto vepra penale, Kodi Penal i Italisë parashikon dënim maksimal deri në 15 vjet burgim. Interpol Tirana vijon procedurat në bashkëpunim me autoritetet italiane, për ekstradimin e këtij shtetasi.
