Gjykata e Durrësit ka vendosur masat e sigurisë për tre shtetasit e arrestuar gjatë operacionit policor “Intervention”, i cili u realizua tre ditë më parë, kur ata po përgatiteshin të kryenin një ngjarje kriminale.
Për Bajram Roçin dhe Bekim Çerën, gjykata caktuar masën “Arrest në burg”, ndërsa Ylli Murati është vendosur në “Arrest shtëpie”. Prokurori i çështjes, Gëzim Veizi, kishte kërkuar masat e njëjta sigurie.
Tre të arrestuarit akuzohen për kanosjen me armë zjarri të një 44-vjeçari në zonën e Plazhit, për motive të dobëta. Policia e Durrësit ndërhyri mbrëmjen e së hënës pas njoftimit për kanosjen në rrugën “Pavarësia”, duke i arrestuar autorët në flagrancë.
Gjatë kontrollit të automjetit të blinduar tip Lancia, në pronësi të Ylli Muratit, u gjetën dy armë zjarri, si dhe një radio e lidhur me kanalet e komunikimit të DVP Durrës.
Po ashtu, në shtëpinë e babait të Bajram Roçit, u sekuestrua një pistoletë.
