Banorët e Bërxullës kanë protestuar sot për të kërkuar shpronësim sipas vlerës së tregut për tokat e tyre që preken nga projekti i rrugës Thumanë-Kashar.
Banorët janë përplasur me policinë dhe disa prej tyre kanë hipur në një shtyllë tensioni, ku kërcënuan se do hidhen. Konkretisht, dy prej tyre hipën në shtyllën e tensionit të lartë në shenjë kërcënimi dhe sensibilizimi për autoritetet, të cilave u kërkojnë t’i trajtojnë me dinjitet të plotë dhe sipas ligjit.
Pas disa orësh negocimesh, dy prej banorëve që kishin hipur në shtyllën e tensionit të lartë zbritën në tokë, por njëri prej tyre ka shfaqur probleme si pasojë e rrezatimit elektrik dhe më pas u desh ndërhyrja e autoambulancës, e cila e transportoi qytetarin për ndihmë në QSUT.
Ndërkohë që për “Fax News” ai është shprehur pasi ka marrë ndihmën mjekësore, teksa ka shtuar se shteti po i sorollat dhe nuk po u jep zgjidhje kërkesave të tyre.
Protestuesi nga Bërxulla, Dritan Zeneli tha se nuk ka frikë nga askush dhe është i gatshëm ta mbrojnë pronën deri në vetëflijim.
Ai kërkoi nga ministrat dhe zyrtarët t’i vënë gishtin kokës dhe të zbatojnë ligjin dhe të heqin dorë nga dhunimi psikologjik ndaj qytetarëve.
“Gjendja ime është më e stabilizuar dhe më mirë, pas këtij akti kisha tension të lartë. Mora vendimin për të zbritur, sepse mendojmë se kemi dhe familje dhe prindër. Pronat tona do t’i mbrojmë dhe do t’i mbrojmë me gjak. Kisha zhurmë në kokë, sepse ka rrezatim të lartë dhe tensioni është shumë i lartë. Në QSUT mora ndihmën e parë dhe ndihem më mirë. Kemi tre muaj që protestojmë dhe nuk kemi marrë asnjë zgjidhje. Nuk ka transparencë në shpronësime”, deklaroi protestuesi.
