Trajneri i ekipit kombëtar, Edi Reja ka folur në lidhje me situatën që futbollisti Elseid Hysaj është duke kaluar, pas tensioneve të shumta që shoqëruan mbërritjen e tij te Lazio. Reja ka treguar se Hysaj është duke kaluar një moment mjaft të vështirë dhe hapja e banderolës së madhe ku disa tifozë të Lazios e quanin atë ‘krimb’, e ka lënduar atë.
Ndër të tjera, trajneri italian ka thënë në një intervistë për arenanapoli.it, se Hysaj nuk ka lidhje me politikën, ndërsa me këngën “Bella Ciao” është njohur nga seriali “La Casa de Papel”.
“Banderola e lëndoi atë, ai po përjeton një moment shumë të vështirë, sapo arriti në një ekip të ri, por i bëri mirë t’i lexonte ato mesazhe, madje edhe në kampin e stërvitjes ai ka marrë shumë mbështetje nga ekipi. Ai nuk mendoikrijonte një situatë të tillë. Hysaj nuk është një person i përkushtuar politikisht. Edhe në ekipin kombëtar, kushdo që është në ndeshjen e parë këndon një këngë në shqip. Elseid më tha që ai e kishte njohur atë këngë ndërsa shikonte “La Casa de Papel”, ka treguar Reja.
Sipas traditës që ka zakonisht ekipi i Lazios, futbollistët e rinj duhet të zgjedhin një këngë për të kënduar para shokëve të skuadrës. Hysaj zgjodhi pikërisht këngën antifashiste “Bella Ciao”, gjë që nervozoi shumë tifozë të Lazios, që e identifikojnë klubin me ekstremin e djathtë. Megjithatë mbrojtësi ka marrë mbështetje nga shumë të tjerë, madje dje shënoi edhe një gol në ndeshjen miqësore të Lazios.
